சவூதியில் கோர விபத்து - இலங்கையர் ஐவர் மரணம்

சவூதி அரேபியாவில் இடம்பெற்ற வாகன விபத்தில் இலங்கையர் ஐவர் உட்பட 29 பேர் கொல்லப்பட்டனர்.

1. ருபீன் முபீஸ் - 412, அலியார் மரிக்கார் வீதி அக்கரைப்பற்று.06
2. சேகு ஆதம்பாவா மீராலெப்பை - 219/1, பதுரிய்யா வீதி, நிந்தவூர்.
3. மொஹம்மட் ஆமிர் ஹப்ஸான் - 64 B, M.B.C.S. வீதி, அட்டாளைச்சேனை.
4. சுலைமான் லெப்பை அப்துல் கபூர் - 357, இரண்டாம் குறுக்கு, சம்மாந்துறை.
5. சிங்களவரான விதானகமகே மென்டிஸ் அப்புஹாமி.

சவூதி அரேபிய நிறுவனம் ஒன்றில் பணி புரியும் வெளிநாட்டவர்களை ஏற்றிக்கொண்டு சென்ற பேரூந்து ரியாத் - தமாம் வீதியில் கனரக வாகனமொன்றுடன் மோதி விபத்துக்குள்ளாகியதில் பேரூந்து தீப்பிடித்து எரிந்துள்ளது.

இப் பேரூந்து விபத்தில் ஐந்து இலங்கையர்கள், நான்கு சவூதி அரேபியர்கள், மூன்று இந்தியர்கள், ஒரு பாகிஸ்தானியர், ஒரு எகிப்தியர், ஒரு பங்களாதேஷி மற்றும் இரு சூடானிகள் உட்பட 29 பேர் கொல்லப்பட்டுள்ளனர்.

தமிழின சுத்திகரிப்பில் ஆர்வம் காட்டும் ஸ்ரீலங்கா அரசாங்கம்.

தமிழின சுத்திகரிப்பில் ஆர்வம் காட்டுவதாக கூறிக் கொள்ளும் ஸ்ரீலங்கா அரசாங்கம் அதன் கோரத் தன்மையினை வன்னி யுத்தத்தின் மூலம் உலகுக்கு எடுத்துக் காட்டியுள்ளது. இராஜபக்ஷ தலைமையிலான இராணுவக் கட்டமைப்பு தமிழினத்தை பூண்டோடு அழிக்க எடுத்த முயற்சியின் ஓரங்கம் தான் வன்னி மண்ணைச் சுடுகாடாக்கியது.

இந்த நிலையில் தமிழீழ விடுதலைப் புலிகள் இயக்கம் முற்று முழுதாக நிர்மூலமாக்கப்பட்டதாக பலதரப்பட்ட செய்திகள் மூலம் அறியக் கூடியதாக உள்ளது. அவ் வியக்கத்தின் மூலக் கருவாக இயங்கிய தலைவர் வே.பிரபாகரன் வீரமரணம் அடைந்த செய்தி அவரை நேசித்த அனைவரையும் மூர்ச்சிக்க வைத்துள்ளது.

போர் யுத்த விதிகளுக்கு மாறாக யுத்தத்தில் சிக்குண்டுள்ள மக்களைக் சிதைப்பதும், போராளிகளைச் சுட்டுக் கொல்வதும் ஸ்ரீலங்கா படையினருக்கு கைவந்த கலை, இதனைத் "தமிழ் அரங்கம்" உலகுக்கு உரத்துக் கூறியுள்ளது, கட்டுரையாளர் பி.இரயாகரன் பேரினவாத பாசிட்டுக்கள் பிரபாகரனைக் கொத்திக் கொன்றுள்ளனர் எனக் கோரமான தலைப்புடன் படங்களையும் ஆதாரப்படுத்தி பதிவு செய்துள்ளார்.

தமிழ் அரங்கம்: "பேரினவாத பாசிட்டுக்கள் பிரபாகரனைக் கொத்திக் கொன்றுள்ளனர்" - பி.இரயாகரன் (அழுத்தவும்)

கரிநாள்

புதுமாத்தளன் யுத்தசூனியப் பிரதேசத்தில் தொடர் செல் தாக்குதல்

யுத்த சூனியப் பிரதேசமாக ஸ்ரீலங்கா அரசாங்கத்தினால் பிரகடனப்படுத்தப்பட்டுள்ள முல்லைத்தீவின் புதுமாத்தளன் வைத்தியசாலையின் அருகான பகுதியெங்கும் ஸ்ரீலங்கா இராணுவத்தினரால் வீசப்படும் செல் வீழ்ந்து வெடித்துக் கொண்டே இருப்பதாகவும் அத்துடன் பாதுகாப்பு வலயத்தை நோக்கி துப்பாக்கி வேட்டுக்களும் தீர்க்கப்படுவதாக வைத்திய அதிகாரி வரதராஜா தெரிவித்தார்.

2009.04.09 ஆம் திகதியான இன்று மாலை 4 மணி வரை வைத்தியசாலை பதிவுப் புத்தகத்தில் பதியப்பட்ட தகவலின்படி 272 பேர் காயமுற்று வைத்தியசாலையில் அனுமதிக்கப்பட்டுள்ளதாகவும், இன்னும் காயப்பட்டவர்கள் மக்களால் அழைத்து வரப்படுவதாகவும், 35 பேரின் இறந்த உடலங்கள் வைத்தியசாலையில் வைக்கப்பட்டுள்ளதாகவும், இதில் பத்துக்கும் அதிகமான சிறுவர்களின் உடலங்கள் அடங்குவதாகவும், பிற்பகல் 4 மணியளவில் வைத்தியசாலையின் வைத்திய அதிகாரி டாக்டர் வரதராஜாவின் அலுவலக கூரை மீதும் செல் வீழ்ந்து வெடித்ததாகவும் அறிய முடிகின்றது.

செல்வீச்சும், துப்பாக்கி வேட்டும் தொடர்ந்து மக்களைத் தாக்கிக் கொண்டே வருவதனால், தெருக்கள் வெறிச்சோடிக் காணப்படுவதாகவும், மக்கள் நிலப் பதுங்குகுழிக்குள்ளே பதுங்கியுள்ளதாகவும், செல் வீச்சில் சிக்குண்டு இறக்கும் மக்களின் உடலங்கள் தெருக்களில் காணப்படுவதாகவும் அறிய முடிகின்றது, இறந்தவர்களின் எண்ணிக்கை 100 பேருக்கும் அதிகமாக இருக்கலாமென டாக்டர் வரதராஜா தெரிவித்தார்.

எட்டுப் போருட்களின் விலை குறைப்பு.

ஸ்ரீலங்காவில் தினமும் தொடரும் யுத்த சூழலைத் தொடர்ந்து பொருட்களின் விலைவாசி தினமும் அதிகரித்து வருவதனால் மக்கள் பொருளாதாரரீதியில் தலைதூக்க முடியாமல் திண்டாடி வருவது யாவரும் அறிந்ததே!

கடந்த நள்ளிரவு 2009.04.09 ஆம் திகதி முதல் எட்டு வகையான அத்தியாவசியப் பொருட்களின் விலைகள் குறைக்கப்பட்டு விலை நிர்ணயம் செய்யப்பட்டுள்ளதென விசேட வர்த்தமானி அறிவித்தல் தெரிவிக்கப்பட்டுள்ளதாக நுகர்வோர் விவகார அமைச்சர் பந்துல குணவர்தன தெரிவித்தார்.

1. 1 kg சீனி - - - ரூ. 73.00
2. 1 kg பருப்பு - - - ரூ. 175.00
3. 1 kg பட்டாணிக் கடலை - ரூ. 98.50 சதம்.
4. 1 kg சம்பா அரிசி - - ரூ. 70.00
5. 1 kg சிவப்பு பச்சை அரிசி - ரூ. 60.00
6. 1 kg பால் மா வகைகள் - ரூ. 637.00
7. 1 kg கோழி இறைச்சி - - ரூ. 320.00
8. 1 பொதி சீமெந்து - - ரூ. 785.00

செஞ்சிலுவைப் பணியாளர் செல்வீச்சுக்குப் பலி

2009.04.08 ஆம் திகதி அம்பலவன்பொக்கணை என்னுமிடத்தில் குடிநீர் பெறுவதற்காக சென்ற சர்வதேச செஞ்சிலுவைச் சங்கப் பணியாளரும் மூன்று பிள்ளைகளின் தந்தையான சின்னத்துரை குகதாஸன் மீது செல் வீழ்ந்து வெடித்ததனால் ஸ்தலத்திலேயே கொல்லப்பட்டுள்ளாரென சர்வதேச செஞ்சிலுவைச் சங்கம் தனது குறிப்பில் தெரிவித்துள்ளது

திரிபோஷா பெற காத்திருந்த மக்கள் மீது செல் தாக்குதல்

தமிழீழ விடுதலைப் புலிகளின் கட்டுப்பாட்டில் இருந்த வன்னியிலுள்ள பகுதிகள் அனைத்தும் ஸ்ரீலங்கா இராணுவ வசமானதைத் தொடர்ந்தும் 2009.04.08 ஆம் திகதி இன்று காலை 7.30 மணியளவில் அம்பலவன்பொக்கணை எனும் பிரதேசத்திலுள்ள ஆரம்ப சுகாதார நிலையத்தில் திரிபோஷா மற்றும் குழந்தைகளுக்கான பால்மா பெறுவதற்குக் காத்திருந்த 500 பேருக்கும் மேற்பட்ட மக்கள் குழாத்தின் மீது 5 செல்கள் வீழ்ந்து வெடித்தது.

இச் சம்பவதில் 8 பேர் கொல்லப்பட்டதுடன் 53 பேர் பலத்த காயங்களுக்கும் உள்ளாகினர். இவ்வேளை ஆரம்ப சுகாதார நிலையத்துக்கு அருகிலிருந்த வீடுகளில் வீழ்ந்த செல்லினால் 5 பொது மக்கள் கொல்லப்பட்டனர்.

பின்னர் இந்தப் பகுதியில் காலை 11 மணியளவிலும் பல செல்கள் வீழ்ந்து வெடித்தன, இன்று வீழ்ந்து வெடித்த செல்களினால் 283 பொது மக்கள் காயத்துக்கு இலக்காகி வைத்தியசாலையில் அனுமதிக்கப்பட்டுள்ளனர், இச் சம்பவத்தில் கொல்லப்பட்டு வைத்தியசாலைக்குக் கொண்டு வரப்பட்ட 22 பேரின் உடலங்களை தமிழர் புனர்வாழ்வுக் கழகத்தினர் அடக்கம் செய்வதற்காக வைத்தியசாலையில் இருந்து எடுத்துச் சென்றுள்ளனர்.

வைத்தியசாலைப் பகுதி மீது வீசப்பட்ட செல் வீச்சில் 100 பேருக்கும் மேற்பட்ட பொது மக்கள் இறந்திருக்கலாமென கிளிநொச்சி மாவட்ட சுகாதார சேவைகள் பணிப்பாளர் டாக்டர் சத்தியமூர்த்தி தெரிவித்தார்.